Inyigisho ya Yesu ku isengesho mu murongo wacu ufungura irashimangira urwego rushya mu isengesho. Icya mbere, Umwami aravuga ku munsi mushya – umunsi w’agakiza – aho uzisabira Data mu Izina rye; uhagaze mu mwanya we. Ibi byari mbere y’uko apfa, agahambwa akazuka. Bityo agakiza, kashobotse gusa nyuma y’izuka rye, kari kataraboneka. Rero igihe yavugaga ati “Uwo munsi nta cyo muzambaza. Ni ukuri, ni ukuri, ndababwira yuko icyo muzasaba Data cyose mu izina ryanjye azakibaha” Yavugaga ku munsi w’Itorero; nyuma y’izuka rye.

N’ubwo bimeze bityo, benshi mu kutabimenya binginga Yesu iyo basenga. Watega amatwi nk’amagambo ari mu masengesho yabo ukumva ngo “Mwami Yesu, ndagusaba ngo umpe iki n’iki mu Izina rya Yesu.” Dukurikije inyigisho za Yesu, gusenga gutyo sibyo. Urugero, umuvugizi w’igihugu ntabwo agihagararira yibereye mu gihugu cye. Akazi ke kaba ari ako gukorera mu mwanya wa leta ye aho yatumwe – mu kindi gihugu.

Kimwe n’ibyo, byaba atari byo gusenga Yesu mu Izina rye. Uhagarara mu mwanya we, ufite uburenganzira bwo gukoresha Izina rye ugasaba Data. Rero, ntabwo ari Yesu usenga cyangwa ngo usenge binyuze muri We, ahubwo usenga mu Izina rye. Iyo niyo mpamvu yavuze ati “Mugende mu Izina ryanjye!” Ushobora kuvuga uti “Nyamara nasenze Yesu kandi aransubiza!” Nibyo, ariko ni ukubera ko uri uruhinja mu bintu by’Imana; nyuma y’igihe, Imana igutegerejeho gukura. Mu Byakozwe n’Intumwa 17:30, Bibiliya iratubwira iti “Nuko iyo minsi yo kujijwa Imana yarayirengagije, ariko noneho itegeka abantu bose bari hose kwihana.” Iyo usenze mu Izina rya Yesu, uhagarara mu mwanya we ugahinduka Ijwi rye; ni kimwe n’uko Yesu ubwe yaba ari we uri kwisabira. Bityo, icyo usaba Data cyose azakiguha.

Niba hari icyo wifuza gusaba Data kandi wifuza kugihabwa, bikore mu Izina rya Yesu, ntugisabe Yesu cyangwa binyuze muri Yesu. Urwo nirwo rwego rushya rw’isengesho rw’icyaremwe gishya.

Gucengera Ijambo

Abafilipi 2:9

Yohana 14:13-14